ASHINDWA KUFANYA MTIHANI WA TAIFA KWA KUMPIGA MWALIMU

Pichani ni mkuu wa shule ya Maramba sec iliyopo Maramba Wilayani Mkinga Magdalena Wandi

MWANAFUNZI wa kidato cha Pili katika Shule ya Sekondari Maramba, Joseph  Charles ameshindwa kufanya mtihani wa Taifa wa kidato cha pili baada ya kutuhumiwa kumpiga mwalimu wa shule hiyo wakati wa kazi ya kupanga viti kujiandaa na mitihani hiyo iliyoanza Oktoba4mwaka huu.

Hatua hiyo imekuja baada ya mwanafunzi huyo kufanya vurugu wakati wakipanga viti na kuamua kumpiga mwalimu huyo hali iliyosababisha Jeshi la Polisi kuzingira shule hiyo ili kuzuia vurugu zilizojitokeza.

Mkuu wa Shule hiyo, Magdalena Wandi amesema baada ya tukio hilo kamati ya nidhamu ya shule imemsimamisha masomo mwanafunzi huyo na kushindwa kufanya mtihani huo wa taifa.

Mwalimu Wandi amesema uamuzi zaidi wa kumwadhibu mwanafunzi huyo kwa tukio hilo la utovu wa nidhamu litafikiwa hadi hapo bodi ya shule hiyo itakapo kaa.

Aidha Mkuu huyo wa shule ametoa wito kwa wazazi kuacha tabia ya kuwatetea watoto wao wanapokuwa wanafanya  makosa kwani kufanya hivyo kunarudisha nyuma harakati za kuboresha elimu hivyo amewataka kuungana kwa pamoja kuinua kiwango cha elimu kwa kuwapa maadili mema watoto wao.